ಮನದಾಳದ ಮಾತು

ಹೇಗೆ ಮರೆಯಲಿ?

ಮನ ನುಡಿದಿಹ ಮಾತನು ಸ್ವರವಾಗಿ ಹೊಮ್ಮಿಸಲೇ?
ಎದೆಯ ಕಾಡಿ ಕೊರೆಯುವ ನೂರು ಚಿಂತೆಗಳ ತಿಳಿಸಲೇ?
ನಿನ್ನ ನೆನಪುಗಳಲಿ ನಾ ಹೊಂದುವ
ಭಾವನೆಗಳ ಸುಂದರ ನೆನಹುಗಳ ಬಿಚ್ಚಿಡಲೆ?
ಕಣ್ಣಂಚಿನಲಿ ಚಿಮ್ಮಿ ಬಂದು ಹಿಂಗಿ
ಒಣಗಿ ಹೋಗುವ ಕಣ್ಣೀರಿನ ಕವನವ ಬರೆಯಲೇ?
 
ನಿನ್ನನು ಮರೆತು ಬಿಡಬೇಕೆಂದು ಅಂದುಕೊಂಡಾಗಲೆಲ್ಲ
ಮುಂಜಾವಿನ ಮಂಜಿನ ಹನಿ ಕಣ್ಣೀರಾಗುತ್ತದೆ..
ಸಂಜೆಯ ಆಕಾಶ ಅಂಗಲಾಚುತ್ತದೆ...
ಹೇಗೆ ಮರೆಯಲಿ, ಹೇಳು ಗೆಳತಿ?

ಮರೀಚಿಕೆ

​ಅದೊಂದು ದಿನ ಚಿತ್ತಭಿತ್ತಿಯ
ಒಡೆದು ನೀ ಲಗ್ಗೆಯಿಟ್ಟೆ
ನಿನ್ನೆದೆಯ ರಾಗಕ್ಕೆ ನಾನೇ
ಸ್ವರವಾಗಿ ಮಿಡಿತವಾಗಿ ಸ್ಪಂದಿಸಿದೆ
ಮನದಲೆ ಸುಖಿಸಿದೆ ಮತ್ತೆ
ಮುದುಡಿ ಮಡಿದೆ
 
ನೋಟದಿಂದಲೇ ನಿನ್ನ
ಕಣ್ಣಾಟದಿಂದಲೇ ನಾ ಕರಗಿ
ಹೇಳಲಾರದೆ ನಾ ಬೆಂದೆ
ಒಳಗೊಳಗೇ ಬೇಕೆಂದು ಬೇಡಿದರೂ ಮನಸು
ನಿನ್ನೊಲವ ನಾ ಬಲ್ಲೆ ಕ್ಷಮಿಸು

ಕೋರಿಕೆ

ಬಿರುಗಾಳಿಯ ತಂಗಾಳಿಯ ಪಯಣವೇ
ನೆನಪಿನ ನದಿಗಳೆ ಕಾಡದಿರಿ
ಬಾಳ ರಮ್ಯತೆಯ ಚಿಮ್ಮಿಸಿ ಹಾರುವ
ಹಳದಿ ಚಿಟ್ಟೆಗಳ ಕಾಡದಿರಿ
ಯಾವ ಬಣದಲ್ಲೂ ಉತ್ತರವಿಲ್ಲದ
ಒಡೆಯದ ಒಗಟೆ ಕಾಡದಿರಿ
ಪ್ರಾಣ ಘಳಿಗೆಯ ಒಳಗೆ
ಕೆಂಪು ತಾವರೆಯೇ ಅರಳದಿರಿ
ಎಲ್ಲೆಲ್ಲೂ ಚೆಲ್ಲಿದ ನೋವಿನ ನಡುವೆ
ಗುಲಾಬಿ ವನಗಳೆ ಸುಳಿಯದಿರಿ
 
ಇಲ್ಲವಾಗಿರೋ ಮಲ್ಲಿಗೆ ಕಂಪೆ
ಕತ್ತಲು ಕಳೆದ ಮಿಂಚಿನ ಹುಳವೇ
ದೂರ ಮಾಡಿಸಿದ ಸೀಳು ದಾರಿಗಳೇ
ಕಳೆದ ರಸ ನಿಮಿಷಗಳೇ ಕಾಡದಿರಿ

​ಕಡಲು ಮತ್ತು ನಾನು

ಮೇಲೆ ನಲಿವಿನ ನೊರೆಯು
ಕೆಳಗೆ ನೋವಿನ ಕೊರೆತ
ಹೊರಗೆ ಬಲು ಉಬ್ಬರ
ಒಳಗೇನೋ ಕಾತರ
 
ಮೇಲೆ ತಂಪಿನ ಕಾಪು
ಒಳಗೆ ಬೆಂಕಿಯ ಕೆಂಪು
ಮೀನು ಮೊಸಳೆಗಳಂತೆ
ತೊರೇವ ನೋವುಗಳಲ್ಲೆಲ್ಲ
ಒಡಲ ತುಂಬಿ ಎಲ್ಲೆಲ್ಲೋ
ಒಂದೊಂದು ನಡುನಡುವೆ
ಸಿಗಬರುವ ಮುತ್ತೀನಾ ತರದಿ
ಮಧು ಬಿಂದುವು......
 
ನಿನ್ನದೀ ಪರಿಯೇ ನನಗೂ ಬಂದಿಹುದು
ಬಾಳಲೇ ಬೇಕೆಂತೂ ವಿದಿಯು ತಂದಿಹುದು
​

ಮೂಕ ಪ್ರೇಮ

ನಗುವ ಸಂಕೋಚಿಸುವ
ನಿನ್ನ ಹೃದಯ ನನ್ನ ಅರಮನೆಯಲ್ಲಿ
ನಿನ್ನ ನೆನಪೇ ಹಾಸಿಗೆಯಾಗಿ ಹಾಸಿ
ಕನಸಿನ ಆಲಿಂಗನದಲಿ ಸುಖ ನಿದ್ರೆ ಪಡುವೆ
 
ಅವಕಾಶ ಸಿಕ್ಕಾಗ ಆಕಾಶ ನೋಡುತ್ತಾ
ಮೋಡಗಳ ರಾಶಿಯಲಿ ನೀ ಚದುರುತ್ತಲಿದ್ದೆ
ಒಮ್ಮೆ ಮಳೆಯಾಗಿ ಸುರಿದು ನನ್ನನು
ಭಾವನೆಗಳಲಿ ನೆನಸ ಬಾರದೆ ಗೆಳತಿ
 
ಸುಯ್ಯುಗುಡುವ ಗಾಳಿಯಲಿ
ನೀ ಹಾಯಾಗಿ ತೇಲುತಲಿದ್ದೆ
ವಿರಹ ವೇದನೆಯಲಿ ನಾ
ಕೊರಗಿ ಬಳಲುತಲಿದ್ದೆ
ಆನಂದದ ಬೆಸುಗೆಯಲಿ
ನನ್ನನು ಬಂದಿಸಬಾರದೆ ಗೆಳತಿ

ಬದುಕು

ಪ್ರವಾಹ

ವ್ಯರ್ಥ ಕನಸು
ಕೊನೆಗಾಣದ ಈ ಪಯಣ
ಕೈಗೂಡದ ಅದೆಷ್ಟೋ ಆಸೆ
ಬಯಕೆಗಳ ಮಹಾ ಜಾತ್ರೆ
 
ನನಸು ಕನಸುಗಳ ಲೋಕದಲ್ಲಿ
ಏಳುತ್ತಾ ಬೀಳುತ್ತಾ ನಡೆದಿರುವ
ಕಲ್ಲುಮುಳ್ಳುಗಳ ಹಾದಿಯ ಯಾತ್ರೆ

ನೆನಪು

ನಾ ಕಟ್ಟಿದ ಕನಸಿನ ಗೋಪುರ
ಬಿರುಗಾಳಿಗೆ ಸಿಲುಕಿ ಉರುಳಿದಾಗ
ಉಳಿದಿದು ನಾ ನಿನ್ನೊಂದಿಗೆ
ಮಳೆಯಲಿ ನಿಂತ ನೆನಪು ಮಾತ್ರ
ನೀ ಮುಳುಗಿಸಿ ಹೋದ
ನೋವಿನ ತೆರೆಗಳಲಿ
ಅಪ್ಪಳಿಸುತ್ತಿರುವ ನಾನು
ಪ್ರವಾಹದೊಂದಿಗೆ ಹರಿವ ಕಡ್ಡಿಯಾಗಿದ್ದೇನೆ
ಈ ಬದುಕು ಬಂಜರು ನೆಲದಲ್ಲಿ
ಹಸಿರೊಡೆಯದ  ಆಸೆಗಳು
ಸುರಿಯುತ್ತಲೇ ಸೋರಿಹೋಗುತ್ತವೆ
ನನಸಾಗದ ಅದೆಷ್ಟೋ ಕನಸುಗಳು
ಅರ್ಥವಿಲ್ಲದೆ ವ್ಯರ್ಥವಾಗುತ್ತದೆ

ಸುಖ​

​ಜಗದಿ ಹಲವರಿಗೆ ಸುಖ
ನಲಿವುಗಳಿಂದ ನನಸಾದ ಕನಸುಗಳಿಂದ
ಕೆಲವರಿಗೆ ಮಾತ್ರ ಯಾತನೆಗಳಿಂದ